Суперлига 22-тури доирасида “Динамо” жамоаси Самарқандда амалдаги чемпион Тошкентнинг “Пахтакор” клубини қабул қилади. Кетма-кет мағлубиятлар сабаб қуйи поғонага тушиб қолган “Динамо”га ғалаба сув ва ҳаводек зарур.

Суперлига. 22-тур.
19 октябрь (шанба)
«ДИНАМО» - «ПАХТАКОР»
Ҳакамлар: Аҳрол Рисқуллаев, Тимур Галеев, Александр Сидоров, Элёр Турсунов.
Назоратчи: Марат Исмоилов.
Комиссар: Лазиз Қўчқоров.
Самарқанд, “Динамо” стадиони.
Ўйин бошланиш вақти: 16:30
ТВ-трансляция: «Cпорт» ТВ

Ҳозирги ҳолат

Рақибларимиз “Пахтакор” жамоаси ўтган турда “Сўғдиёна” клубини йирик ҳисобда мағлуб этиб, расман чемпионликни тантана қилган бўлса, “Динамо” Наманганда “Навбаҳор”га қарши майдонга тушиб, белгиланган пенальти эвазига минимал ҳисобдаги мағлубият билан сафардан қайтди. Натижада “Динамо” айни дамга келиб, турнир жадвалининг сўнгги поғонасига тушиб қолди. Бу сафарги ўйинда Тачмурод Агамуродов шогирдларига уч очко жуда зарур.

Ўзаро ўйинлар

Олий Лига тарихида “Динамо” ва “Пахтакор” жамоалари 47 марта учрашишган. Баҳсларнинг 36 тасида “Пахтакор”, 6 тасида эса “Динамо” ғалаба қозонган, 5 та ўйин дуранг билан якунланган. “Динамо” ва “Пахтакор” ўртасидаги Самарқанддаги сўнгги ўйин 2017 йилда ўтиб, ўшанда 0:0 ҳисоби қайд этилган. Тошкентдаги 1-даврада ўтказилган ўйинда эса 2:0 ҳисобида “Пахтакор” ғалаба қозонган.

Кимлар майдонга тушмайди?

“Пахтакор”га қарши “Динамо” таркибида йўқотишлар мавжуд. Намангандаги сўнгги ўйинда бош ҳакам Шерзод Қосимов ҳужумчимиз Қадамбой Нурметовни четлатгани, Жасур Азимовга эса мавсумдаги 4-сариқ карточкани кўрсатгани боис, ушбу икки футболчи чемпионга қарши майдонга туша олмайди. Шота Арвеладзе жамоасида эса йўқотишлар йўқ. Терма жамоа футболчилари “Пахтакор” сафига қайтишган.