Италия футбол федерацияси «Фиорентина» ярим ҳимоячиси Франк Риберини 3та ўйинга дисквалификация қилди. Франциялик футболчи А сериянинг 9-тури доирасида бўлиб ўтган ўйинда ўзини номуносиб тутган.

Рибери учрашув сўнгида ҳакам билан баҳслашди ва якунда футболчи бош ҳакам ёрдамчиси Маттео Пассерини икки марта туриб юборди.

Бунгача Франк захирага олингани учун бош мураббий билан можарога борган эди. Баҳснинг 75-дақиқасида у майдонни тарк этар экан, бошини чайқади, сўнгра Винченцо Монтеллага қўл узатмади.

Рибери ёзда эркин агент сифатида «Фиорентина»га ўтган эди. У мазкур мавсумда 9та ўйинда майдонга тушиб, иккита гол урди ва иккита голга узатма берди. Франциялик футболчи «Сассуоло», «Кальяри» ва «Парма»га қарши ўйинларни ўтказиб юборади.