Месси зўрми ёки Роналдуми, деб мендан кўп сўрашади. Икковидан бирини танлаш ҳам мантиқсиз,  шундай деб жавоб бериш эса, анча умумий бўлиб қолади.

Бу ерда Месси ва Роналду ўртасидаги фарқни англаб олиш муҳим. Месси - футболчи, унинг буюклиги мана шу тўртбурчак майдон ичида мужассам. У худди қўшни маҳаллада тўп тепадиган болакай сингари Чемпионлар Лигасида ҳам ўйнаб кетаверади. Унинг ҳаёти, оиласи, характери, ютуғи, камчиликлари ҳам мана шу майдонда ўлчанади - у кубокни ютган, бунисини ютолмаган, фалон голни урган, фалон пенальтини уролмаган ва ҳоказо.

"Уни кўчада кўрсангиз, худди мактаб боласига ўхшайди, лекин форма кийиб майдонга тушиши билан, бошқалар унинг олдида болакай бўлиб қолади" - деганди Биксант Лизаразю.

У ҳеч қачон ўзини кўрсатишга мухтож эмасди. Шу ҳолатдаям доим чўққида қолиш. Осон эмас.

Роналду эса, кўпроқ - шахсият. Уни мана шу чўққига туғма истеъдодидан ҳам кўра, курашувчан характери, меҳнати, ғолибликка бўлган интилиши олиб келди. Камбағал оилада туғилди, "Манчестердаги "дедовшина"надан порлаб чиққан, "Реал"да ўтиб ҳам, энг зўр бўлди, Туринда ҳамон беназир. Уни майдон ташқарисида ҳам яхши таниймиз - бироз аразчи, бироз мақтанчоқ, бироз қувноқ.  

"Бир куни олти яримда базага келдим. Ўзим учун шуғулланмоқчи бўлдим. Қарасам, аллақачон Криштиану келиб бўлган, зарбаларни машқ қилаётганди" - деб эслайди Карлос Тевес.

У доим ўзини кўрсатиш ва исботлаш эхтиёжи билан яшади. Осон эмас.

Футболчи сифатида Мессини, инсон сифатида Роналдуни танлаган бўлардим. Яъни агар бир жамоа мураббийи бўлганимда, Мессини сотиб олиб беришларини сўрардим, бири билан дўстлашгим, гаплашгим келса Роналдуни танлардим...

Қаҳрамон Асланов