Ўзбекистон терма жамоаси мураббийлар штабидан жой олган Азиз Ҳайдаров Саудия Арабистонидан учралган мағлубиятдан сўнг, сайтимиз учун интервью бериб ўтди.

— Бугун терма жамоамизга нима етишмади, деб ўйлайсиз?
— Албатта, омад етишмади. Бугун йигитлар ҳеч қайси жабҳада рақибдан ортда қолишгани йўқ. Афсуски, ўйин сўнггида иккита кичик хатолар туфайли мағлубиятга учрадик. Нафақат мухлислар, балки ўзимиз ҳам сўнгги дақиқаларда ўтказиб юборган голлардан сўнг чуқур шок ҳолатидамиз.

— Шомуродов иккинчи таймда бўшроқ ҳаракат қилгандек туюлмадими?
— Менимча йўқ. У Бугун битта гол киритди ва жамоа учун меҳнат қилди. Афсуски, яратилган вазиятларидан бирини амалга ошира олмади. Шундай бўлсада, унинг ҳизматларини юқори баҳоламаслик нотўғри бўлади.

— Ҳакамлик борасида нима дея оласиз?
— Нима ҳам дердим? Улар ҳам инсон ва улар ҳам хато қилишади. Бугунги учрашувда ҳакамлик ҳақида фикр билдирганим билан ҳеч нарса ўзгариб қолмайди.

— Бугунги мағлубиятдан сўнг, мухлисларнинг майдонга қайтариш жуда мушкул бўлади?
— Дарҳақиқат, бугун стадион бизни тўлиқ қўллаб турди. Минг афсуски, бугун бизда воқеалар кўпайиб кетди. Ҳозир йигитларга нима дейишни ҳам билмай қолдик. Қаттиқ ҳам гапирдик, энг сўнгги имконият эканлиги ҳақида ҳам тушунча бердик. Бир неча кундан сўнг, бизни Фаластинга қарши ўйин кутиб турибди. Йигитларга ортиқча босим уюштиришдан наф йўқ. Олдимизда қолган имкониятлардан фойдаланишдан бошқа чорамиз йўқ. Бу бизнинг йигитлар. Улар бизнинг маҳсулотимиз. Бу йигитларнинг ўрнига Бразилия ёки Аргентинадан футболчи келиб тўп сурмайди. Мухлислардан бугунги мағлубият учун узр сўрайман. Бизни охиригача қўллаб туришларини илтимос қиламан.