20-аср сўнги ва 21-аср бошида тўхтатиб бўлмас кучга айланган «Милан» ҳозирда анчагина камтарин клубга айланиб қолганидан хабарингиз бор. Ўзи шундоқ ҳам ўртамиёна футболчилардан ташкил топган жамоа қишда яна бир нечта футболчиларини қўйиб юбориши таҳмин қилинмоқда. Хўш, улар кимлар? Бугун ушбу мавзуга қисқача тўхталиб ўтамиз.
Рикардо Родригес
«Милан»да янги кафуга айланиши таҳмин қилинган Рикардо Родригеснинг фаолияти анчагина пастлагани бор гап. Сўнгги пайтларда асосий таркибдан ҳам тушиб қолаётган ҳимоячи қишда клубни тарк этиши аниқ бўлиб улгурди. Рикардо янги мавсумда атиги 80 дақиқагина майдонда тўп сурди холос. Тео Эрнандеснинг клуб сафига келиб қўшилиши уни тўлиқ заҳирага михлаб қўйди. «Милан» ўз футболчисини расман трансферга қўйди ва бу орқали яхшигина пул ишлаб олмоқчи. Ҳозирда шветсариялик футболчининг ҳизматларига «Шалке 04», «Боруссия Дортмунд» ва «Эвертон» клублари қизиқш билдиришган.
Давида Калабриа
Академия тарбияланувчиси бўлишга қарамай, Калабрианинг кариераси бошқа клубда давом этадиган кўринади. Ўтган мавсумда барчани ўзига қарата олган қанот ҳимоячисининг бу мавсумда ишлари бироз юришмаяпти. Янги мавсумда 2 та қизил карточка олишга улгурган ҳимоячининг хатолари ҳақида сўзлаб ўтиришдан фойда йўқ. Давида катта эҳтимол билан январь ойида клубни яхшигина сумма эвазига тарк этади.
Фабио Борини
Деярли универсал ҳужумчилардан бири саналмуш Боринининг «Милан»даги ишлари у қадар юришмаяпти. Янги мавсумда атиги 2 та учрашувдагина кўриниш берган ҳужумчи бошқа клубга ўтмаса, заҳирада қолиб кетиши турган гап. Ҳозирда футболчининг агенти «Торино», «Женоа» ва «Кристал Пелас» клублари билан музокаралар ўтказмоқда. Қаҳрамонимизнинг ўзи «Торино» вариянтида қолишни маъқул кўрмоқда. Воқеялар ривожини кузатишда давом этамиз.
Франк Кессиэ
Ўз тенгдошлари ичида жисмонан бақувватлиги ва майдонни яхши кўра билиши орқали ажралиб турган ярим ҳимоячини «Милан» 2017-йилда харид қилган эди. Афсуски, жанжалкаш йигит Балотели изидан боришга қарор қилди ва контрактни қўлга киритгач ўзини жуда ҳам эркин қўйиб юборди. Ҳозирда ўйин амалиётисиз қолаётган Франкнинг қишда жамоани тарк этиши аниқ бўлиб улгурган. 22 ёшли футболчининг Пиоли билан алоқалари яхши эмас. Ҳозирда футболчи билан «Монако» ва «Вулвурҳемптон» жамоалари қизиш билдирмоқда. «Милан» ёш иқтидор эгасини 30 миллиондан камига сотмоқчи эмас.
Кишиштоф Пёнтек
Афсуски, бу ҳужумчининг трансферга қўйилиш эҳтимоли ҳам катта. Поляк катта эҳтимол билан ижара асосида бошқа клубда ўзини кўрсатишга уруниб кўради. «Милан» учун 38 миллион еврога тушган ҳужумчининг янги мавсумда трансфер қиймати 25 миллионга арзонлаб кетди. Бунга мавсумни омадсиз бошлагани сабаб бўлса, ажаб эмас. 13 та турнинг 10 та ўйинида асосий таркибда майдонга тушган ҳужумчи атиги 3 бор гол киритди (2 гол пенальтидан урулган) ва ўзинин тўпурарлик қобилиятини йўқотиб қўйди. Агарда Ибраҳимович ортга қайса, Пёнтекнинг асосий таркибдаги ўрни йўқолиши мумкин. Шундай экан, воқеялар кутилмаган томонга бурилиб кетиши ҳеч гап эмас.
