Душанбе шаҳри раиси Рустами Имомали бошчилигидаги делегация пойтахтимизда меҳмон бўлиб турибди. Ушбу ташрифнинг иккинчи кунида меҳмонлар шаҳримиздаги "Миллий" стадионга ҳам боришди. Чилонзор тумани Бунёдкор шоҳ кўчасида жойлашган мазкур ўйингоҳ 50дан ортиқ секторларга эга ва 34 минг томошабинга мўлжалланган. Делегация аъзолари стадиондаги шароитларни кўздан кечириш давомида футболчилар ва томошабинлар учун яратилган қулайликлар билан танишишди. Стадиондаги "Футбол тарихи" музейидаги экспонатлар ва ўзбекистонлик рефери Равшан Эрматов билан учрашувдан делегация аъзолари, айниқса, мамнун бўлдилар. Рустами Имомали музейни томоша қилар экан “Пахтакор” жамоасида тўп сурган тожикистонлик фахрий футболчи Нуриддин Амриевнинг фотосуратларини ҳам кўздан кечирди. Ўзаро мулоқот давомида Рустами Имомали Осиё давлатлари орасида футболни янада ривожлантириш, Марказий Осиё футбол жамоалари ўртасида мусобақалар ташкил этиш фикрини билдирди.
Маълумот ўрнида қайд этиш жоиз, Рустами Имомали 2019 йилнинг апрель ойидан буён Марказий Осиё Футбол ассоциациясининг Президенти ҳисобланади. Самимий руҳда ўтган суҳбат жараёнидан Душанбе шаҳри раисига 7-рақамли футболка ва Равшан Эрматовнинг дастхати туширилган сариқ ва қизил карточкалар совға қилинди.
Душанбе шаҳри раиси Рустами Имомали бошчилигидаги делегация аъзолари Самарқандга учиб кетдилар.
