Хабарингиз бор, илк бор ўтказилган «Бунёдкор кубоги» халқаро мусобақасида қўшни Қозоғистондан ҳам тўртта жамоа иштирок этди. Гарчи меҳмонларимиз совриндорлар қаторига кира олмаган бўлса-да, турли номинацияларда энг яхшилардан бўлишди. «Аристан-2» ва «Мерса» жамоалари бош мураббийлари турнир ҳақидаги фикрлари билан ўртоқлашди.

Бейбет Кулубеков, «Аристан-2» жамоаси бош мураббийи: - Турнир ташкилотчиларига ўз миннатдорчилигимизни билдирамиз, хусусан, клуб бош директори Улуғбек Мирзаевга. Юртингизда ажойиб мусобақада қатнашдик. Шароитларга гап бўлиши мумкин эмас. Қолаверса, шу беш кун давомида об-ҳаво ҳам футбол ўйнаш учун мос бўлди. Болалар мазза қилиб футбол ўйнашди. (кулиб) Ўзимизни Анталияда йиғин ўтказгандек ҳис қилдик. Кеча Улуғбек аканинг таклифига кўра, академияда меҳмон бўлдик, шароитлар билан яқиндан танишдик. Ўзбекистонда болалар футболи янада ўсиши, ривожланиши тилакдошиман. Мамлакатларимиз ўртасидаги алоқалар янада мустаҳкамланиб бораверсин. Қачон мусобақага таклиф қилсаларинг, лаббай, деб келаверадиган таассуротда ортга қайтяпмиз.

Мусобақа давомида биз тўқнаш келган Ўзбекистон жамоалари камида илиқ таассурот қолдирди. Аслида ўзбек футболи доим кучли бўлиб келган. Бунга турнирда яна бир бор амин бўлдик. Тўғри, биз мусобақада кўпроқ мағлуб бўлдик. Буни ўзига хос сабабли бор. Хусусан, мен бошқарган жамоа 2006 йилда туғилган болалар иборат эди. Атайин Тошкентга бир ёш кичик таркиб билан келдим. Болалар тажриба ортишини истагандим. Ўйлайманки, кўзлаган мақсадимга етдим.

Илдар Бекиров, «Мерса» жамоаси бош мураббийи: - Мусобақа юқори даражада ташкил қилинибди. Майдонлардан тортиб, ҳакамлару ва бошқа ташкилотчиликларга қойил қолиш керак. Бундай ташкилотчиликдан кейин яна бу мусобақага келгинг келаверади, нафақат биз, балки бошқа жамоалар ҳам қатнашишни хоҳлайди. 

Мусобақада кучсиз жамоанинг ўзи бўлгани йўқ. Барча иштирокчилар ўзига яраша кучли эди. Табиийки, кучли рақибларга қарши баҳсларда футболчиларнинг тажрибаси ҳам ошиб бораверади. Шахсан мен бошқараётган жамоага бу мусобақа катта мактаб вазифасини ўтаб берди. Биз ҳар учрашувдан кейин ўйиннинг видео таҳлилини қилдик. Камчиликларимиз устида гаплашдик. Тошкентга натижа учун эмас, ўйин ва тажриба учун келгандик. Жамоамиз ўйиндан-ўйинга кучайди, деб айта оламан.