Испания чемпионатининг 17-тури доирасидаги сўнгги ўйин «Месталья» стадионида бўлиб ўтди. "Валенсия" ўз уйида "Реал"ни қабул қилиб, ғалаба жуда яқин турган эди...

Зидан шогирдлари учрашувни юқори иштиёқ билан бошлаб, рақиб дарвозасига тезкор гол уриш пайида бўлишди. "Кўршапалаклар" эса қийинчилик бўлса-да танаффусга қадар ўз дарвозалари дахлсизлигини сақлаб қолишди. Айниқса, дарвозабон Хауме Доменек иккита вазиятда маҳорат кўрсатишига тўғри келди.

Иккинчи бўлим бошида эса "Валенсия" ҳисобни очиш учун яхши имкониятдан фойдалана олмади. Жарима майдони ташқарисидаги Рамос сирпаниб йиқилиши оқибатида тўпни эгаллаган Ферран Торрес дарвозабон билан яккама-якка вазиятга чиқди, аммо Куртуани доғда қолдира олмади.

Умуман олганда, иккинчи тайм давомида мезбонларнинг устунлиги ошиб борди ва 78-дақиқада бу ўз самарасини берди. Коклен жарима майдонига ўнг томондан ёриб кирган Вассни тўп билан таъминлади. Унинг узатмасидан кейин эса Солер 7-8 метрдан кучли зарба билан тўпни "Реал" дарвозасига жойлади.

Ўйин майдон эгаларининг ғалабаси билан якунланадигандек эди, гўё. Меҳмонлар қўшиб берилган дақиқалар якунланиш арафасида бурчак зарбаси ишлашди. Бурчакдан етказилган узатмага Тибо Куртуа (!) бош билан зарба берди, "Валенсия" посбони уни қайтарди. Аммо тўп Гарайнинг оёғига тегиб Бенземага келиб тушди. Карим эса 3-4 метрдан дарвозани ишғол қилди.

Шу тариқа, 18 декабрь куни бўладиган "эл-класико"га "Барселона" ва "Реал" клублари бир хил — 35 очко тўплаган ҳолда етиб келадиган бўлишди.

Испания Ла лигаси, 17-тур
"ВАЛЕНСИЯ" - "РЕАЛ МАДРИД" - 1:1 (0:0)
Голлар: 1:0 – 78 Солер, 1:1 – 90+5 Бензема.
Валенсия – Доменек, Гайя, Коста (Вальехо, 61), Габриэл Паулиста, Васс, Парехо, Коклен (Кондогбиа, 83), Ферран Торрес (Диакаби, 90), Солер, Гарай, Родриго.
Реал Мадрид – Куртуа, Рамос, Начо, Карвахаль, Варан, Вальверде, Кроос, Иско (Бэйл, 69), Модрич (Йович, 81), Родриго (Винисиус Жуниор, 69), Бензема.
Огоҳлантиришлар: Солер (38), Карвахаль (77), Йович (90).