Испания чемпионатининг 18-тури доирасида "Реал" ўз майдонида "Атлетик"ни қабул қилди.

Зидан шогирдлари биринчи бўлимда камида учта юз фоизли имкониятдан фойдалана олишмади. Учрашувнинг 12-дақиқасида Винисиус яккама-якка вазиятга чиқиб зарба берди, меҳмонлар посбони Унай Симон оёғи билан тўпни қайтарди.

Орадан 8 дақиқа ўтиб Ттони Кроос ажойиб юриш билан рақиб жарима майдонига кирди ва дарвозабон билан юзма-юз вазиятда зарба берди. Тўп тўсинга тегиб қайтди.

34-дақиқада эса Карим Бензема "Атлетик" посбони билан яккама-якка вазиятда Унай Симонни алдаб ўтди ва ўткир бурчак остида зарба берди. Ҳимоячи Нуньес эса товони билан тўпни қайтариб қолди. Қайтган тўпни Винисиус эгаллаганди, аммо бошқа ҳимоячи ундан тўпни олиб қўйиб, хавфни бартараф этди.

"Атлетик"-чи? Улар танаффусга қадар иккита хавфли вазиятни юзага келтиришди. Бир вазиятда йўлланган зарбани Куртуа эгаллаб олди. Иккинчисида эса Иньяки Уильямс "Реал" дарвозасини ишғол қилди. Аммо у тўпни қабул қилиш чоғида кичик офсайдда бўлгани учун гол бекор қилинди.

Иккинчи бўлимнинг 59-дақиқасида яна бир марта меҳмонлар дарвозаси тўсинини титратди. Кроос бурчакдан тўпни ўйинга киритганидан сўнг Начо яқин масофадан бош билан зарба берган эди.

Ўйиннинг асосий вақти тугашига 4 дақиқа қолганида Йович пенальти нуқтаси устидан бош билан зарба йўллади. Тўп эса бу сафар устунга тегиб қайтди.

Шу тариқа, "Реал" катта устунликка эга бўлишига қарамай, "Атлетик"га қарши ўйинда 2 очко йўқотди. Бунгача Зидан жамоаси "Валенсия" ва "Барселона" билан дуранг ўйнаган эди. "Қироллик клуби" 2019 йилни 37 очко билан Ла лига жадвалида 2-ўринда якунлайдиган бўлди.

Испания Ла лигаси, 18-тур
Реал Мадрид – Атлетик 0:0 (0:0, 0:0)
Реал Мадрид – Куртуа, Рамос, Милитао (Начо, 57), Карвахаль, Менди, Кроос, Модрич, Родриго (Бэйл, 62), Вальверде, Винисиус Жуниор (Йович, 72), Бензема.
Атлетик – Унаи Симон, Берчиче, Мартинес, Йерай Альварес, Лекуэ, Рауль Гарсия, Весга, Дани Гарсия, Нуньес, Кодро (Вильялибре, 73), Уильямс (Беньят, 86).
Огоҳлантириш: Рамос (87).