Суперлига клублари мураббийлари 2018 йилдан эътиборан “Про” мураббийлик лицензияси учун ўқув курсларидан таҳсил олишганлигидан хабарингиз бор.

Мазкур ўқув жараёни босқичма-босқич ўтказилди. Унинг якуни эса мураббийларнинг хориж клубларида малака ошириб келишлари билан интиҳо топди. Бекободнинг “Металлург” жамоаси мураббийлари Февзи Давлетов ҳамда Артём Петросян хориж малакасини Туркиянинг “Қосимпошшо” клубида ўташди.
“Қосимпошшо” Туркиянинг “қария” клубларидан бири бўлиб, унга 1912 йилда асос солинган. Уй ўйинларини 14000 томошабинга мўлжалланган “Ражаб Тайип Эрдўғон” номидаги стадионда ўтказади. Айни пайтда жамоага Тайфур Ҳовутчи устозлик қилмоқда. Тайфур узоқ йиллар “Бешиктош” шараҳифини ҳимоя қилган (245 учрашув, 7 гол), мураббийлик фаолиятини ҳам қадрдон жамоасида бошлаган. 2006-2011 йилларда бош мураббий ёрдамчиси, 2011-2012 йилларда бош мураббий сифатида фаолият юритган. 2017-2019 йилларда эса Туркия терма жамоаси бош мураббийи ёрдамчиси сифатида иш олиб борди. 2019 йилдан эса “Қосимпошшо” клубини қабул қилиб олди.

Мураббийларимизнинг Туркияга сафари жуда самарали кечди. Улар мазкур клубнинг ўқув-машғулот жараёни, базаси, бевосита Суперлигадаги ўйинларини кузатишди. Бир сўз билан айтганда, таниқли клубдаги саккиз кунлик сафар жуда самарали бўлди. Ишонамизки бу тўпланган тажрибалар мутахассисларимизга ички чемпионат ўйинларида асқотади.