Ютволдик!

Футболчиларга айтадиганим: бир сизлар эмас, биз ҳам ҳар бир ўйин, ҳар бир ҳаракатингиз чоғида игна устида ўтиргандек ўтирамиз. Сизга осон эмаслигини биламиз, бизга ҳам осон тутманг. Мусобақалар пайтида сиз бизнинг энг яқинимизга айланасиз. Ҳатто яқинларимиздан яқинга. Спорт телеканали ўйинларингизни шунчаки олиб кўрсатаётгани йўқ, бу ерда катта гуруҳ тонгдан кечгача, кечдан тонггача ишлаяпти: меҳмон топамиз, уни чақирамиз, келмаса бошқасини чақирамиз, мавзу ва саволлар ҳозирлаймиз, интернетдан изланамиз, маслаҳатлашамиз, студияни ҳозирлаймиз, чироқ, камера, овоз, лавҳалар..., кўрсатув олиб бориш - қизиқарли олиб бориш, суҳбатдошни мавзуга тортиб олиш, томошабинга қизиқарли етказиш, йўқдан бор қилиш, кечгача ўйинларни кўриш ва кўрсатувларда чиқиш, уйга қайтгач эртанинг режасини тузиш, яна меҳмонлар излаш, қўнғироқлар...

Асло миннат эмас, асло! Бу бизнинг ишимиз, вазифамиз, мажбуриятимиз. Мен шунчаки жараён ҳақида тушунча бердим. Мухлисларга айтадиганим: шунча иш қилинади-ю, баъзиларингиздан сўкиш ҳам эшитамиз: фалончи шарҳловчи бўлмағур, пистончи шарҳловчи бақирворади, бошқаси секин гапиради, шунақаям меҳмон чақирасизларми, титрларда хато ёзяпсанлар, нега фалон ўйин жонли эмас... Эҳ-ҳе, қанча эътирозлар. Майли, розимиз. Ишлаяпмизки, танқид бор. Ўзимиз ҳам биламиз идеал эмаслигимизни. Мукаммал бўлган Зот фақат Ўзи!

Йигитлар! Гуруҳдаги охирги ўйинда уялтирманглар. Биз сизга ишонамиз!

Мухлислар! Эътиборингиз учун, албатта, раҳмат айтамиз. Борингизга шукр!

Бобур Акмалов