Янги мавсумга тайёргарликни Самарқандда ўтказаётган «Динамо» жамоаси ўқув-машғулот йиғини доирасидаги дастлабки учрашувни ўтказди.

Назорат баҳсида «Динамо» клуби Самарқанд вилоят футбол академиясининг 2001/02-йилларда туғилган футболчилардан иборат жамоасига қарши майдонга туширди.

Шу куни «Динамо» мураббийлар штаби бир қатор янги ёш футболчиларни синовдан ўтказди. Ўйин давомида тажриба бобида рақибидан устунлик қилган «динамочилар» йирик ҳисобда ғалаба қозонишди.

Ҳисобни 13-дақиқада марказий ҳимоячи Жасур Уринов очган бўлса, 18-дақиқада булунғурлик ёш иқтидор Шаҳзодов фарқни иккитга оширди. 30-дақиқада Қадамбой Нурметов ҳисобни йирик кўринишга олиб келган бўлса, 71-дақиқада Шарофиддин Шобиров жарима зарбасини голга айлантирди – 4:0.

Қайд этиш жоиз, шу куни жароҳати боис Ҳакимхон Аъламхонов, Дамир Темиров, Шоҳруҳ Абдураҳмонов, Амиржон Сафаров сингари футболчилар майдонга туша олишмади.

Кунига икки маҳалдан машғулотлар олиб бораётган «Динамо» жамоаси тайёргарликни Самарқанддаги ўз қароргоҳи ва Самарқанд туманидаги стадионда давом эттирмоқда.

Назорат учрашуви. 1 февраль (шанба)

«Динамо» - Самарқанд вилоят академияси (U18-19) – 4:0

Cамарқанд тумани БЎСМ стадиони

Голлар: Жасур Уринов 13, Шаҳзодов 18, Қадамбой Нурметов 30, Шарофиддин Шобиров 71.

«Динамо»: Шоҳруҳ Эшбўтаев (Шоҳруҳ Раимов, Фарҳод Раҳматов), Комил Шарофутдинов, Жасур Уринов, Ш.Шаҳзодов, Шарофиддин Шобиров, Бобур Қосимов, Жасур Азимов, Обид Ҳакимов, Санжар Баратов, Низом Норов, Қадамбой Нурметов.