Австралиянинг Мельбурн шаҳрида теннис бўйича "Australian Open" мусобақасига якунига етди.

Турнирнинг эркаклар ўртасидаги финал баҳсида сербиялик Новак Жокович австриялик Доминик Тимга қарши баҳс олиб борди.

Мусобақа 2-рақам остида сараланган Жокович биринчи сетда иккита "брейк"ни амалга ошириши оқибатида ҳисобда олдинга ўтиб олди. Турнир давомида юқори савияли ўйин намойиш қилган Тим тезда ўзига келди ҳамда иккинчи ва учинчи бўлимларни ўз фойдасига ҳал қилди.

Тўртинчи сет тенг курашлар остида кечаётган эди. Тажрибали Новак керакли пайтда "брейк"ни амалга ошириб қолиб, ўйинни бешинчи сетга кўчирди.

Сербиялик ракетка устаси сўнгги сетда ҳам бурилиш нуқтасини топа билди ва учрашувни ўз фойдасига ҳал қилди.

Шу тариқа, роппа-роса 4 соат давом этган ўйинда Новак Жокович 6:4, 4:6, 2:6, 6:3, 6:4 ҳисобларида ғалаба қозонди ва фаолиятида 8-маротаба Австралия Очиқ чемпионати ғолибига айланди. "Улкан тож" туркумидаги турнирлардаги ғалабалар сони эса 17 тага етди.