Янги мавсумга тайёргарликни Туркиянинг Белек шаҳрида олиб бораётган Наманганнинг “Навбаҳор” клуби ихтиёрига бугун яна икки нафар хорижлик футболчилар қўшилишди.

Булар –  молдовалик Георге Андроник ва туркманистонлик Дидар Дурдиев.

Георге Андроник 1991 йил, 25  сентябрда Молдова пойтахти Кишинёв шаҳрида туғилган. Амплуаси – ярим ҳимоячи.

Футболчилик фаолияти давомида Молдованинг “Зимбру” ҳамда “Милсами”, Хорватиянинг “Локомотива” ва “Горица”, Швециянинг “Вернамо” ҳамда “Дегерфорс” клубларида ўйнаган.  

Ўтган мавсумни эса Руминиянинг “Астра” жамоасида ўтказган.

2011 йилдан буён Молдова терма жамоасида тўп суради.    

Дидар Дурдиев эса 1993 йилнинг 16 июлида Туркманистоннинг Болқонобод шаҳрида таваллуд топган. Амплуаси – ҳужумчи.

Фаолияти давомида Туркманистоннинг “Ашхобод”, “Ахал”, “Олтин аср” ва “Хазина” клубларида тўп сурган. Ўтган мавсумда эса “Ахал” шарафини ҳимоя қилган. 2012 йилдан буён Туркманистон терма жамоасида ўйнайди.

Таъкидлаш жоизки, Дидар Туркманистоннинг яқин ўтмишдаги машҳур футболчиларидан бири Курбангелди Дурдиевнинг ўғли.

Мазкур легионерлар жамоамизнинг бугунги машғулотларида иштирок этишди.

Ушбу хорижлик футболчилар “Навбаҳор” мураббийларида яхши таассурот қолдиришса, клуб билан шартнома имзолашади.

“Навбаҳор” ПФК матбуот хизмати.