Yangi mavsumga tayyorgarlikni Turkiyaning Belek shahrida olib borayotgan Namanganning “Navbahor” klubi ixtiyoriga bugun yana ikki nafar xorijlik futbolchilar qo‘shilishdi.

Bular –  moldovalik George Andronik va turkmanistonlik Didar Durdiyev.

George Andronik 1991 yil, 25  sentyabrda Moldova poytaxti Kishinyov shahrida tug‘ilgan. Ampluasi – yarim himoyachi.

Futbolchilik faoliyati davomida Moldovaning “Zimbru” hamda “Milsami”, Xorvatiyaning “Lokomotiva” va “Gorisa”, Shvesiyaning “Vernamo” hamda “Degerfors” klublarida o‘ynagan.  

O‘tgan mavsumni esa Ruminiyaning “Astra” jamoasida o‘tkazgan.

2011 yildan buyon Moldova terma jamoasida to‘p suradi.    

Didar Durdiyev esa 1993 yilning 16 iyulida Turkmanistonning Bolqonobod shahrida tavallud topgan. Ampluasi – hujumchi.

Faoliyati davomida Turkmanistonning “Ashxobod”, “Axal”, “Oltin asr” va “Xazina” klublarida to‘p surgan. O‘tgan mavsumda esa “Axal” sharafini himoya qilgan. 2012 yildan buyon Turkmaniston terma jamoasida o‘ynaydi.

Ta’kidlash joizki, Didar Turkmanistonning yaqin o‘tmishdagi mashhur futbolchilaridan biri Kurbangeldi Durdiyevning o‘g‘li.

Mazkur legionerlar jamoamizning bugungi mashg‘ulotlarida ishtirok etishdi.

Ushbu xorijlik futbolchilar “Navbahor” murabbiylarida yaxshi taassurot qoldirishsa, klub bilan shartnoma imzolashadi.

“Navbahor” PFK matbuot xizmati.