Испаниянинг «Реал Сосьедад» клуби бош мураббийи Иманоль Альгуасиль Мадриднинг «Реал» клубини (4:3) мағлуб этганидан хурсанд эканлигини яширмади.

- Мадридга муносиб ўйин намойиш этиш учун ташриф буюргандик. Мухлисларимиз бу ғалабага ҳақли эди. Ўзимизни қандай ҳис қилаётганимизни тасаввур қилинг, ахир 32 йилдан бери Испания Кубоги ярим финалига чиқа олмаётгандик. «Реал» клубини тўлиқ трибуналар кўз ўнгида мағлуб этганимиз учун ўзимиздан фахрланамиз. Тўғри, биз ишонч билан ҳаракат қилдик, лекин кимга қарши майдонда тўп сураётганимизни билардик. Улар ўйин тизгинини бутунлай ўзгартириб юборишлари мумкин эди. Ҳакам финал ҳуштагини чалгунча, улар билан ҳар қандай натижа қайд этилаётган бўлса ҳам охиригача ўйнаш керак. Финалга чиқишга ҳаракат қиламиз, - деди Альгуасиль Marca нашрига.