Италиянинг «Интер» клуби футболчиси Матиас Весино Европа Лигасининг 1/16 финалида «Лудогорц» (2:0) устидан қозонилган ғалаба ҳақида фикрлари билан ўртоқлашди.
«Танаффусдан кейин ўйнимизни ўзгартириб, рақиб дарвозасини икки бор ишғол этишга муваффақ бўлдик. Жамоамиз Разград шаҳрига ғалаба қозониш учун ташриф буюрганди. Иккинчи учрашувда ҳам бугунгидек футбол намойиш этишимиз керак.
Энди бизнинг мақсадимиз А Серия ўйинида ғолиб чиқиш бўлади, чунки сўнгги турлардаги мағлубиятлар руҳий аҳволимизга таъсир кўрсатганди. Чемпионатда ғалаба қозонишда давом этишни хоҳлаймиз», — деди Матиас Весино.
«Нерадзурилар»нинг А Сериядаги кейинги рақиби «Сампдория» клуби бўлади.
