Англия чемпионатининг 27-тури доирасида "Арсенал" ўз уйида "Эвертон"ни қабул қилиб, жуда қийин ғалабани қўлга киритди.

Ливерпулликлар рақиб дарвозасини ишғол қилишган пайтда учрашувнинг эндигина 49-сонияси ўтиб бораётган эди. Жаримадан етказилган узатмани "Арсенал" ҳимоячиси қайтарди, аммо тўпни эгаллаган  Доминик Кэлверт-Льюин чалқанча зарба билан ҳисобни очди.

Шундан сўнг Артета шогирдлари ўйинни назоратини ўз томонларига олиб, бир нечта хавфли вазиятлар яратишди. Уринишлар 27-дақиқада ўз самарасини берди. Сака чап қанотдан етказган узатмани Эдди Нкетиа "Эвертон" дарвозасига буриб юборди.

Орадан кўп ўтмасдан "канонирлар" олдинга ўтиб олишди. Давид Луиснинг узатмасидан кейин Пьер-Эмерик Обамеянг дарвозабон билан яккама-якка вазиятга қочиб кетди ва дарвозани забт этди.

Биринчи бўлимга қўшиб берилган дақиқаларда эса мерсисайдликлар бурчак зарбасини амалга оширишди ва Ришарлисон имкониятдан фойдаланиб, мувозанатни тиклади.

Иккинчи бўлим бошида эса "Арсенал" яна олдинга ўтиб олди. Пепе қанотдан етказган узатмани Обамеянг дарвозага жойлашга муваффақ бўлди.

Шундан сўнг мезбонлар устунлик ва тўп назоратини "Эвертон"га бериб қўйишди. Меҳмонлар нақ 3та вазиятни голга айлантиришда уларга омад етишмади. Ўз навбатида, 88-дақиқада Нкетианинг зарбасидан кейин тўп тўсинга тегиб қайтганини таъкидлаш лозим.

Ушбу ғалабадан кейин "Арсенал" ўз очколарини 37тага етказиб, жадвалда 9-ўринга кўтарилиб олди.

Англия премьер-лигаси, 27-тур
Арсенал – Эвертон 3:2 (2:2)
Голлар: 0:1 – 1 Кэлверт-Льюин, 1:1 – 27 Нкетиа, 2:1 – 33 Обамеянг, 2:2 – 45 Ришарлисон, 3:2 – 46 Обамеянг.
Арсенал – Лено, Колашинац (Сака, 18), Давид Луиз, Мустафи, Бельерин, Себальос (Торрейра, 76), Ўзил (Гендузи, 82), Жака, Пепе, Нкетиа, Обамеянг.
Эвертон – Пикфорд, Сидибе, Мина, Холгейт, Бейнс, Сигурдссон, Шнайдерлин (Андре Гомеш, 59), Ивоби (Бернард, 60), Делф (Кин, 82), Ришарлисон, Кэлверт-Льюин.
Огоҳлантиришлар: Шнайдерлин (31), Ришарлисон (45), Сигурдссон (73), Андре Гомеш (90).