Пичоқ, болта, арра ёки қилич бўлиши керак бўлган темир бўлагининг тақдири шу - болғадан ҳам, сандондан ҳам зарб ейди. Шарҳловчини шу темирга ўхшатаман - бир жамоа ютқазса, мухлисларидан танқид, дакки ва ҳатто ҳақоратларни қабул қилади. Буниси ютқазса, бунисининг мухлисларидан. Лекин ҳар қандай ҳолатда ҳам ўз услуби ва ўзи тўғри деб билган йўлдан оғишмай шу ишда давом этиш — матонат.

Шарҳловчи "медийный персона". У бу йўлга кираётганда нималарга дуч келиши мумкинлигини оз бўлсада билади, тушунади. Кириб бўлгач, ҳис қилади.
*
"Навбаҳор" зўр ўйнади. Номдор рақибидан умуман чўчимади. Ўйиннинг дастлабки декадаси наманганликлар устунлиги остида ўтди. "Пахтакор" "Навбаҳор"дан шундай қаршиликни кутгандир, аммо бундай ўйинга ва қаршиликнинг бу даражасига амалда тайёр эмас экан. Тўғри, кейинчалик илк таймнинг ярмидан бошлаб ўзига келди ва ўйинда устунликка эриша бошлади. Бироқ яшин тезлигидаги қарши ҳужумларнинг бирида гол ўтказиб юборди. Таймни мағлуб ҳолда тарк этди.

Умуман, ҳар икки тайм учун, ўйин учун жамоаларга ташаккур айтиш лозим. Қийин ўйин ўтказишди.
*
Ҳакам барча карточкаларни ҳақли берди, деб ҳисоблайман. Барча кўрсатилган карточкаларда ўша карточкаларга лойиқ фоллар содир этилди. "Навбаҳор" футболчиси Исоқжонов бор айбни ўз зиммасига олиши керак. Рақибга қарши бир хил қўполлик ишлатди, ҳар икки қоида бузилиши бир хил - иккаласи сариққа лойиқ. Гап йўқ. Кримец ишлатган қўполликлар ҳам худди шундай. Иккала футболчи ўйиндан ҳақли тарзда четлатилди. Танташевга бу борада шахсан ўзимнинг эътирозим йўқ.
*
Ҳакамга эътирозим бошқа жиҳатга: бу ўйинга уни ким тайинлади? Равшан Эрматовми ё бошқа? Ўйинни ўқиш, ўйин ичида бўлиш, футболчилар ва муҳитни ҳис қилиш борасида ҳакамга лекция ўқишдан йироқман, унинг ўзи яхшироқ билса керак. Лекин билган нарсасини амалда қўллай олмади — ўйин тизгинини қўлдан чиқарди, ўйин кайфиятини тушунмади. Оқибатда даҳанаки жанглар, провокациялар ва симуляциялар кўпайди. Айрим футболчилар фол бўлмаган жойда ҳам бор овози билан бақириб, ўлаётгандек думалаб, "публика"га ўйнаши тобора авж олди. Ҳаддидан ошган тўптепарлар билан қаттиққўл туриб гаплаша олмади, юмшоқлик ва уқувсизлик қилди ҳақам, оқибатда футбол кам, кураш ва тўполон кўп бўлган ўйин гувоҳи бўлдик.
*
Ўйинга тайинлов бўлганидаёқ хурсанд бўлдим.
Марказий ўйин.
Катта афиша.
Мавсумнинг илк ўйини.
Барчанинг эътибори.
Катта босим.
Наманганлик мухлислар. Ҳаммасини билган ҳолда, онгли равишда бу тайинловдан хурсанд бўлдим. Чунки шундай ўйинларда тобланади шарҳловчи. Ҳа, унинг ишидан мағлуб томон рози бўлмайди, албатта. Наманганлик мухлислар ўтган йилги шарҳимдан қанчалар хурсанд бўлган бўлишса, бунисидан шунчалик хафа бўлгандирлар балки. Гап менда ё анави бошқа шарҳловчида эмас, футболда, футболчиларда, натижада бўлади бундай пайтларда. Начора, била туриб бош суққанмиз бу арининг уясига. Чидаймиз!
*
Стадиондан кузатганларга тасанно. Иккала жамоа мухлисларига ҳам. Намангандан келган чамаси 5 минг мухлис супермуҳит яратдилар. Вувузелани қайлардан топиб келдинглар-э?:)

"Пахтакор" мухлислари ҳам басма бас мухлислик қилишди. Ўзидан зўрроғи келса унинг даражасига етишга ҳаракат қилади-ку одам, шунақа бўлди.

"Навбаҳор" ўз мухлисларидан рози бўлиши лозим! Доим айтамиз — бу мухлислар кўпроғига лойиқ. "Навбаҳор" бу йил ўтган мавсумдагидан кўпроғини кўрсатиши керак!

Наманганлик мухлислар уйларига омонликда етиб олишларига тилакдошман. Ўтган йилги мудҳиш ҳодиса ёдимизда. Эҳтиёт бўлинглар. Оқ йўл!

"Пахтакор" мухлислари, сизларга табрик!
*
Бу бошланиши. Бутун мавсум олдинда. Шу шашти сўнмасин жамоаларнинг. Ёзнинг иссиғида ланжланиб, кузда яна эски тоз, эски ҳаммом бўлиб, ўйинлар сотишга ўтиб кетишмаса, чемпионат яхши ўтади.
***
Ўзимга ва ҳамкасбларимга ҳам омад!
Дарвоқе, ҳамкасбларим бахтли одамлар. Чунки улар ижтимоий тармоқларда мухлислар билан мулоқотда бўлишмайди. Улар Твиттер, Фейсбук, Инстаграм, Телеграмда фаол эмаслар. Шунинг учун мухлислар уларга таъна тошларини ёғдиришмайди, ёғдиришган тақдирда ҳам улар буларни эшитишмайди. Мен эса, афсуски, "медийная персона". Эшитамиз.

Соғ бўлинг!

Бобур Акмалов.