Мартнинг биринчи куни Испанияда «Эл-класико» бўлиб ўтади. Жамоалар турнир жадвалида ёнма-ён боришмоқда. Чемпионлик учун кураш авжида. Иккиси ҳам ЧЛ плей-офф босқичидаги илк ўйинни ёмон ўтказди.

Биз бу ўйинда яна бир бор Мессининг қандай спорт формасида эканини билиб олармиз, балки...

Зиданнинг ротациялардаги топқирлигига яна гувоҳ бўлармиз, балки...

Балки, ҳамма танқид қилаётган Бэйл қаҳрамонга айланар...

Ёш Ансу Фати класикодаги илк голини урар, балки!

Булар ё бўладиган, ё бўлмайдиган ишлар. Тахминлар, холос!  

Бироқ, бўлиши аниқ бўлган бир иш ҳам бор.

Биз «Эл-класико»дан аввал, ўйин вақти ва баҳсдан сўнг ўзи учун ярим мисқол нафи бўлмаган воқеа атрофида ўз юртдошини тармоқда ёки реал ҳаётда сўкаётган, уришга тайёр бўлган ва урганларни кўрамиз, албатта!

Тармоқда севимли клубининг мағлубиятидан сўнг ёқа йиртаётганлар тўдасини кўрсам ғашим келади. Ўзи виртуал олам қизиқ. "Ҳеч ким мени билмайди, танимайди", - деб ҳаётда пичирлаб ҳам айтолмайдиган гапларини қофиясига солиб, шеър қилиб ёзадиганлар кўп бу ерда. Баъзилар ўзига умуман алоқаси бўлмаган футболчилар-у, клубларни "ҳимоя" қиламан деб, оғзидан шундай гаплар чиқаради-ки, бунақа нажосат асли бошқа жойдан чиқмасмиди, деб хайрон бўлади одам. Бир-бирига таҳдид қилишларни айтмайсизми! Яқинда блогерлардан бири "клавиатура орқали фронт кўрганлар" ҳақида қисқа аммо ҳақ гапни айтди. Баъзи, қайтараман — баъзи тоифа фанатларни ҳам шундай тарифлаган бўлардим.

Футбол гўзал спорт тури. Ундаги яшилликнинг ўзи инсонга руҳий ҳордиқ бера олади. Чиройли ўйин, чиройли голлар... бирор клуб ё футболчига мухлислик қилишда ҳам айб йўқ, асло! Аксаримиз ҳам шундаймиз, масалан. Лекин, ўша мухлисликнинг ҳам чегараси бор эмасми?!

Асосли баҳслар бош устига. Бунда фикр алмашиш мумкин камида.

Аммо, ёш болалар каби "кимнинг клуби зўр" ўйинига берилиб, ҳурматни тўкиш тўғрими?!  Наҳот мириқиб футбол кўриб, натижа қандай бўлсада қўл ташлашиб хайрлашишнинг иложи йўқ?! Лол қолдирадигани баъзилар футболнинг бор кайфини  шундан деб тушунишида. "Урушмаса, сўкишмаса, талашмаса...унда мухлислик қилишдан нима фойда", - деганди бир одам менга. Ҳа! Мантиқ — даҳшат!

Хуллас, бу сафар ҳам «Эл-класико» атрофида классик манзаранинг гувоҳига айланамиз.

Қани эди янглишаётган бўлсам, қани эди ундай бўлмаса!

Ориф Толипов.