Суперлиганинг 1-туридан ўрин олган АГМК ҳамда «Металлург» жамоалари ўртасидаги ўйиндан кейин олмалиқликлар устози Миржалол Қосимов қўйидаги фикрларни билдириб ўтди.
«Авваламбор 2020 йилги футбол мавсуми бошлангани билан мухлислар ва футбол жамоатчилигини табриклайман. "Металлург"га қарши баҳс кутилганидек қийин ўйин бўлди. Ўйиннинг дастлабки қисмида ёмон таассурот қолдирмадик. Бир нечта вазиятлар бўлди ва гол урдик. Голдан кейин ҳам рақиб дарвозасини ишғол этиш учун вазиятлар яратилди. Лекин бу вазиятларни голга айлантира олмадик. "Металлург" эса бизни қарши ҳужумда жазолади. Иккинчи таймда ҳеч қайси жамоа ютқазишни хоҳламади, баҳс жанговор руҳда кечди. Мавсумнинг илк учрашуви бўлгани туфайли футболчиларда қандайдир ҳаяжон ҳам сезилди. Ўз уйимизда ғалаба қозонишимиз керак эди. Лекин бугунги учрашувдаги дуранг натижаси адолатли бўлди.
Ҳисоб очилганидан кейин натижани ушлаб қолишни эмас, яна гол уришга ҳаракатни кучайтириш лозим эди. Футболда озгина хотиржамликка берилиш ҳам ярамайди. Бир зум хотиржамликка берилиш ҳам қимматга тушиши мумкин. Айнан шу нарса бугун панд берди. Футбол шуниси билан ҳам қизиқ".
