“Тоттенҳем” клуби бош мураббийи Жозе Моуринmо “РБ Лейпциг”га қарши жавоб учрашувидан (3:0) сўнг, ўз фикр ва мулоҳазалари билан ўртоқлашиб ўтди.

"Кеча кайфиятим жуда яхши эди. Учрашув давомида ҳам ўзимни шундай тутишим керак эди. Биз барчамиз ишонган эдик. Бу жуда қийин. Боз устига, рақибимиз ҳам жуда кучли эди. Ўйиндаги илк хатоларимиздаёқ рақиблар гол яратишди ва кейин ўйин жуда ҳам оғир кечди.

Жисмонан улар бугунги учрашувда яхшироқ формада эди. Бундан ташқари, рақиб майдон марказдаги мобиллик ва ҳужумдаги тезлик эвазига ҳам натижа кўрсатди деб ҳисоблайман.

Энг қизиғи шундаки, биз бугун ҳам ўтган учрашувда йўл қўйган хатоларимизни такрорладик. Ваҳоланки, биринчи учрашувдан сўнг барчасини қайта кўриб чиққан эдик. Баъзан сен шунчаки бундан ортиғини амалга ошира олмаслигингни ҳис этасан. Мен ўз йигитларимдан ҳам бундан ортиғини талаб қила олмайман.

Баъзан шундай ходисалар рўй берадики, улар бизни келажакда янада кучлироқ бўлишга ундайди. Ҳеч кимни айбламоқчи эмасман. Айниқса, ҳар бир учрашувда камида бир ойга сафдан чиқиш билан якунланаётган жароҳатлар занжирига илакишиб қолган чоғимизда айбдор қидиришнинг ҳожати йўқ. Афсуски, бу мавсум шундай кўриниш олди. Ўзи шундоқ ҳам мавсум муаммолар билан бошланди ва у “даҳшатли” жароҳатларга уланиб кетди. Ҳаммаси Угонинг биринчи жароҳат олишидан бошланган эди аслида. Бугунги учрашувдан сўнг футболчиларимни айбламоқчи эмасман. Улар қўлларидан келган барча ишни қилишди.

Биз бу учрашувга ўз режаларимиз билан ташриф буюрган эдик. Ўйин бошланишига икки соат қолганида эса Санчеснинг жароҳати ҳақидаги хабарни эшитдик. Ўйлашимча, ҳеч ким бундай вазиятда “туриб бера олмас” эди", — деди Моуриньо.