Англия чемпионатининг 28-туридан ўрин олган «Манчестер Сити» ва «Арсенал» жамоалари ўртасидаги ўйин бошқа муддатга қолдирилди. Мазкур учрашув бугун — 11 март куни бўлиб ўтиши керак эди.
«Ноттингем Форест» ва «Олимпиакос» клублари хўжайини Евангелос Маринакис коронавирусга чалинганидан сўнг жамоалар эҳтиёт юзасидан мазкур ўйинни қолдиришга қарор қилишди.
Бундан 13 кун аввал «Олимпиакос» клуби Европа лигаси доирасида «Арсенал» билан «Эмирейтс»да тўқнаш келган эди. Ўшанда грецияликлар раҳбари Маринакис "канонирлар"нинг баъзи ўйинчилари ва клуб ходимлари билан учрашган эди.
«Арсенал» ва «Манчестер Сити» жамоалари тиббий маслаҳатларга амалга қилган ҳолда дастлаб вазиятни тўла назорат қилиш ҳамда ўйинни бошқа муддатга қолдириш ҳақида қарор қабул қилишди. Премьер-лига ҳам бу қарорга розилик билдирди.
АПЛнинг бошқа ўйинларини кўчириш режалаштирилмаяпти.