Coca-Cola Суперлигаси 3-туридан ўрин олган “Сурхон” – “Насаф” (1:2) баҳсидан сўнг мезбонлар устози Баҳром Ҳайдаров учрашув борасидаги ўз фикрларини билдириб ўтди.

“Насаф” яхши футболчиларга эга бўлган жамоа. Рақиб тўпни яхши назорат қиларди. Қарши ҳужум борасида энг кучли жамоалардан бири саналади. Беллашувни яхши бошлаган эдик. Сўнг биринчи бўлимда рақиб устунликни қўлга олди. Рикошет вазиятдан сўнг юзага келган гол йигитларнинг руҳиятига салбий таъсир кўрсатди.

Иккинчи бўлимда ҳисобни тенглаштиришга эришдик. Қарши ҳужумдан сўнг ўтказиб юборилган гол боис яна беллашувнинг бориши ўзгарди. Бугун ғалаба қозонишимиз ҳам мумкин эди. Чунки, голдан сўнг қарши ҳужумни ўтказиб юбормасак яхши ўйин кетаётган эди.

“Сурхон” жамоасида яхши футболчилар йиғилган. Улар ҳали ўз сўзини айтишади. Мағлубиятдан хулоса чиқариб, келгуси беллашувларда ғалаба қозонишга ҳаракат қилиш керак”, – деди Ҳайдаров.

“Сурхон” матбуот хизмати билан ҳамкорликда тайёрланди.