Бугун "Ҳилтон" меҳмонхонасида шу кунларда юртимизда бўлиб турган, УEФА делегацияси иштирокида ЎФА раҳбар ҳамда ходимлари билан, ЎзПФЛ ва Суперлига клублари вакиллари билан учрашувлар якунига бағишланган матбуот анжумани бўлиб ўтди. Унда УФА биринчи вице-президенти Равшан Эрматов, УEФА Assist ташкилотининг халқаро алоқалар бошқармаси раҳбари Ева Паске, ЎФА матбуот ва медиа департаменти раҳабари Даврон Файзиев ҳамда қатор ОАВ вакиллари иштирок этишди. Анжуманда мавжуд камчиликлар ва уларнинг халқаро тажриба асосидаги ечиш борасида фикрлар алмашилди.

"Бугун футболимизда 3 асосий масала мавжуд, яъни ҳар томонлама сифатли футбол майдонлари, халқаро талабларга тўлиқ жавоб бера оладиган спорт инверторлари ва салоҳиятли мураббийлар. Мана шуларга тўғри ечим топа олсак, шунда ривожланиш тез суръатларда ўсиши мумкин", — деди Равшан Эрматов.

Ева Паске ҳам Ўзбекистонда ўтган 5 кунлик сафарнинг 3 кунида бошқарув соҳасини ўрганиб, таҳлил қилишга ажратганлиги, икки кунида эса ижрои қўмита вакиллари билан учрашувлар ташкил этилганлигини ва уларга ўзига хос ҳаракатлар йўлини белгилаб берилгани ҳақида таъкидлаб ўтди.

Шунингдек, "Ўзбек миллати ҳақиқатдан ҳам футболни севадиган миллат эканлигини яна бир бор англадим", - деди УEФА вакиласи. Тадбир якунида бу ташриф келажакдаги кўп йиллик ҳамкорликнинг дебочаси бўлганлиги таъкидланди. Шунингдек, журналистлар ушбу ҳамкорлик борасидаги ўзларини қизиқтирган саволларга, мутахассислар томонидан жавоблар олишди.