«Реал» ярим ҳимоячиси Марко Асенсио коронавирус туфайли юзага келган танаффус пайтида ўтказилган "FIFA 20" турнирининг "La Liga Santander Challenge" йўналишида ғолибликни қўлга киритди.
Ушбу футбол симулятори мусобақасида Ла лиганинг 20та клубидан бир нафардан ўйинчи иштирок этди. Фақат «Барселона» аъзоси Серхи Роберто сўнгги паллада турнирда иштирок этмасликка қарор қилди. Чунки "FIFA 20" ўйинининг ишлаб чиқарувчиси бўлган "EA Esports" кампанияси бу соҳада "кўк-анорранглилар" ҳомийси — "Konami" фирмаси рақобатчиси ҳисобланади.
Турнир 20-22 март кунлари ўтказилди. Якшанба куни эса ҳал қилувчи плей-офф босқичи ўйинлари ўтказилди. Марко Асенсио бошқарувидаги «Реал» финалда «Леганес» шарафини ҳимоя қилган Айтор Руибални мағлуб этди — 4:2.