«Реал»нинг собиқ ярим ҳимоячиси Жюльен Фобер Мадрид клубидан унга биринчи қўнғироқ келган дамларни эслади. "Қаймоқранглилар" французни «Вест Хэм»дан 2009 йил январда ижарага олишганди. Футболчи 4 ой давомида иккита ўйинда майдонга тушиб, 54 дақиқа ўйнаган, холос.

«Биз жамоа автобусида «Аптон Парк» стадионига «Фулхэма»га қарши ўйинга кетаётган эдик. Менга "Реал"дан бир француз йигит қўнғироқ қилди. "Салом, мен "Реал"да ишлайман, биз сен билан гаплашиб олишимиз керак", деди у. Мен эса муҳим ўйинга бораётганимни ва гаплашишга вақтим йўқлигини айтиб, телефонни ўчириб қўйдим. Ўйин тугади, мен эса телефонни ёқдим, қарасам, 30 та СМС ва 50 тача овозли хабар. Шундагина тушундимки, бу жиддий.

Мен агентимга қўнғироқ қилдим, у эса "Реал" раҳбарияти билан учрашишимиз кераклигини айтди, бунинг учун раҳбарият бўлиб турган «Хитроу» аэропортидаги меҳмонхонага боришимиз керак эди. Ўша кун трансфер ойнасининг охирги куни, биз трансферни келишиб олдик. Кейин нарсаларимни олиб кетиш учун «Вест Хэм»га қайтдим. Жамоадошларим эса менга кулиб туришарди: «Жюльен, тушуняпсанми, бу ахир Мадриднинг "Реал"и!».

Кейин Марк Нобл мени  менсимай қўйганини эсладим ва унга гапирдим: "Марк, энди муаммо борми?" У эса: «Жюльен, мен сен билан гаплаша олмайман. Сен "Реал" футболчисисан, мендан устунсан", деди. Бу ҳақда кўп ҳазиллашардик», — деди Фобер.