Лондоннинг "Челси" клуби янги стадион қуриш учун олган рухсатномасининг муддати 31 март куни ўз якунига етади.
2017 йилнинг январ ойида «Челси» клуби «Стэмфорд Бридж» стадионини кенгайтириш ва ободонлаштириш учун рухсат олганди. Клуб хўжайини Роман Абрамовичга Буюк Британияга ишлаш визаси берилмаганидан сўнг, лойиҳа 2018 йилнинг май ойида тўхтатилганди.
Кейинроқ «Челси» ноқулай инвестиция шароитларини рўкач қилиб ишни кейинги сурди. Шундан сўнг, Brexit туфайли ноаниқликлар юзага келди.
Клубнинг расмий сайтида 31 март куни янги стадион қуришга берилган рухсатнома муддати якунланиши ҳақида хабар пайдо бўлди.
«Биз мухлисларимиздан ҳамда манфаатдор томонлардан сабр қилишгани ва бизни тушунишгани учун миннатдормиз. Янги стадион барпо этиш учун бошқа вариантларни кўриб чиқамиз», — дейилади сайтда берилган баёнотда.
