Биласиз, 1 апрель ҳазил куни бўлганлиги туфайли кўплаб дўстлар, оғайни ва ака-укалар бир-бирига яхши маънода кўплаб ҳазиллар қилишади.

Шу муносабат билан бугунги кун тарихидаги воқеаларни, унутилмас ҳазил ва ундаги самимият кўпчилик томонидан тўғри қабул қилинади.

Кўплаб клублар айнан шу куни фейк, ҳазиломуз тарзда йирик трансфер ёки шов-шувли хабарларни эълон қилишади. Биз эса бундай ҳаракатдан фойдаланмаган ҳолда ҳазил кунига бағишланган АГМК футболчиси Санжар Турсунов билан боғлиқ воқеани эътиборингизга тақдим қиламиз.

"Украинадаги фаолиятимда "Ворскла"да ўйнаб юрган кезларимда бир ёш футболчига ҳазил қилганим ҳамон ёдимда. Энди ёшлар жамоасидан асосий таркибга ўтиб, ўйинларда иштирок этишни бошлаган футболчини олдимга чақирдим ва уни бош мураббий излаётганини айтиб, охирги ўйинлардаги ҳаракати ёққани ва у билан яхшиланган тартибда янги шартнома, яъни маош масаласида гаплашмоқчи бўлаётганини таъкидладим. У эса хурсанд ҳолда шошиб мураббий хонасига йўл олди. Орадан бироз вақт ўтгач мураббий ва футболчи хонадан чиқишди. Ичкарида нима бўлганини аниқ билмадим-у, лекин ҳазил куни бўлгани туфайли буни мураббий тўғри тушунганди. Роса кулгу бўлганди ўша воқеа", — дея 1 апрель куни билан боғлиқ ҳазилини эслади Санжар Турсунов.