«Брешия» президенти Массимо Челлино мавсумни якунлаб қўйиш ҳақида қарор қабул қилинса, жамоани майдонга туширмаслигини айтиб ўтди.

«Ушбу мавсумдан бошқа маъно қолмади. Учрашувларни мухлисларсиз ўтказишга тўғри келади ёки ўйинчиларнинг соғлиғига таваккал иш бўлади. Чемпионатни қайта давом эттириш — бу шунчаки аҳмоқлик. Агар бизни мажбур қилишса, мен жамоани майдонга туширмайман. Ҳар бир ўйинда 0:3 ҳисобида мағлубиятга учраймиз», — деди Челлино "La Gazzetta dello Sport" нашрига берган интервьюсида.

«Мени А сериядан тушиб кетиш масаласи қизиқтирмайди. Ҳозирча пастга тушиб кетишга муносиб бўлиб турибмиз, бунда менинг ҳам айбим бор. Мавсумни давом эттириш учун барча қоидаларни — ўйинчиларнинг шартномалари, бюджетлар, банклар билан ҳисоб-китоблар, трансфер бозори, тайёргарлик, янги мавсумнинг бошланиши каби ишларга ўзгартириш киритишимиз керак. Мутлақо тартибсизлик», — деди Челлино.

«УЕФА раҳбарлари такаббур ва масъулиятсиз. Улар фақат ўзларининг иқтисодий манфаатлари ва мусобақалари ҳақида ўйлашади. Аммо А серия тақдирини УЕФА эмас, Италия ҳал қилади. Ҳар икки кунда битта ўйин? Нима УЕФА суткани 72 соатга узайтира оладими?» — дея қўшимча қилди «Брешия» президенти.

Маълумот ўрнида. "Брешия" А сериянинг 26-туридан кейин 16 очко билан жадвалда энг сўнгги поғонани эгаллаб турибди.