Виржил ван Дейк «Ливерпуль»да ўйнамайдиган Премьер-лиганинг энг яхши 5 футболчиси номини айтди. Шунингдек, мерсисайдликлар ҳимоячиси ўз номзодларига изоҳ ҳам бериб ўтди.

Дарвозабон: Эдерсон («Манчестер Сити»)
«Ўйлашимча, у ажойиб дарвозабон. Ушбу мавсумда кўпгина яхши посбонларни кўрдик, аммо Эдерсон улар орасида энг яхшиси. У Алиссонга ютқазса ҳам – Эдерсон биринчи рақамли посбон».

Ҳимоячилар: Эмерик Лапорт («Манчестер Сити»)
«У «Манчестер Сити» учун қанчалик муҳим ўйинчи эканини намойиш қилмоқда. Ажойиб ҳимоячи. У жуда ва жуда яхши ҳимоячи. Шунинг учун мен уни танлайман».

Ярим ҳимоячи: Кевин де Брюйне («Манчестер Сити»)
«Назаримда, бу позицияда фақат «Сити» ўйинчилари! Лекин де Брюйне ҳақида кўп гапириш шарт эмас. Аввало, Кевин – яхши йигит. Шу билан биргаликда у зўр футболчи. Уни қаттиқ ҳурмат қиламан. У фантастик ўйинчи».

Ярим ҳимоячи: Сон Хёнг Мин («Тоттенхэм»)
«У тезкор, у кучли, у ҳимоячиларнинг ишини дўзахга айлантириш учун майдонга чиқади. У чап оёқда ҳам, ўнг оёқда ҳам вазиятни ажойиб якунлай олади. Шунинг учун уни танлайман».

Ҳужумчи: Пьер-Эмерик Обамеянг («Арсенал»)
«Мавсум давомида амалга оширган ишларига таяниб, уни танлайман. Ляказетт ва Обамеянг — ажойиб ҳужумчилар жуфтлиги. Шунингдек, мен ҳужумга Агуэрони ҳам қўйишим мумкин эди. Аммо Обамеянг – яхши ҳужумчи эканини рақамлар ҳам кўрсатиб турибди».