Ўзбекистон ёшлар терма жамоаси бош мураббийи Темур Кападзенинг фикрича, Беларусь чемпионатида иштирок этаётган Жасур Яхшибоев янада ўсиш учун имкониятларга эга.

Эслатиб ўтамиз, Жасур "Энергетик-БГУ" сафида мавсумнинг дастлабки 3та ўйинида 3та гол урди ва битта голга узатма берди.

"Жасур — ижодкор йигит. У ҳеч ким кутмаган қарорларни қабул қилади. Шунингдек, яхши техника эгаси. Яхшибоев "Пахтакор" сафида кўзга кўрина бошлаган эди, аммо мураббий унга кўп ишонч билдирмади. У "Олмалиқ"да ўйнаб кетишга ҳаракат қилди, аммо омади чопмади. Энди эса Беларусда ўзини кўрсатмоқда. Янада ўсишга эришиш учун унда имкониятлар бор, аммо кўп нарса унинг ўзига ва мураббийига боғлиқ", — деди Кападзе.

"Беларусь чемпионати унинг учун бир синов. Албатта, Беларусь – Жасурбек учун юқори даража эмас. Аммо битта нарсани тушиниш керак: ўз Ватанингда ўйнай бошқа, хорижда ўйнаш бутунлай бошқа нарса. Легионер сифатида сенга эътибор юқори бўлади. Сен эса тўла куч билан ўйнашинг шарт. Яхшибоев Беларусь чемпионатида олдинга қадам ташлайди, деб ўйлайман", — ўз сўзига якун ясади Темур Кападзе.