13 апрель куни "Барселона" клуби афсонаси Карлес Пуйоль 42га кирди. Кўз ўнгимизда тарих ёзган ва майдондаги жангчиларга ҳақиқий ўрнак бўлган йигит шу бўлади.

"Реал" мухлислари ҳам Карлесни ҳурмат қилишади. Гарчи фаолияти бошларида мураббийлар унинг ўйинидан рози бўлмай, қай бир клубга ўтиши лозим бўлиб қолганида, таклиф фақатгина қироллик клубидан тушганида, “Ҳеч қачон! "Реал"га ўтмайман. Ундан кўра футболни йиғиштириб қўя қоламан!” деган йигит шу Пуйоль бўлса-да...

Карлес фаолиятини дарвозабонликдан бошлаган. Онасига ёқмагани учун ҳимояга ўтиб ўйнашни бошлаган. Футболга умуман қизиқмайдиган ва икки мартагина Барса иштирокидаги учрашувни стадиондан кузатган онахон ўша қарори билан ажойиб иқтидорни кашф этганини билармикан?

Пуйоль бурнини синдириб олганида, маска тақиб ўйнаган. Анча учрашув. Мухлислар ўзини ноқулай ҳис этаётган ҳимоячини қўллаб-қувватлаш учун бир куни ажойиб акция уюштирадилар – бутун стадион маска тақиб томоша қилган "Барселона" ўйинини. Ҳурматни қаранг!

Пуйолни нима деб аташган, биласизми? Тарзан, Темир Карлес ва “Шерюрак”.

Хави у ҳақда шундай дейди: "У шер каби қўрқмас ва адолатли”. Супермен деган номи ҳам бор ва бунинг тарихи мавжуд.

Карлес ёшлигида маҳалласига келган циркдан илҳомланиб, уйдагиларидан суперменнинг либосини олиб беришни сўрайди. Болакайнинг гапига йўқ деган жавоб берилади. Карлес эътироз қилиб иккинчи қаватдаги уйидан сакрайди. Унинг бобоси бу воқеани эслар экан, Карлесга кейинчалик либос олиб берилдими, йўқми, эслолмайману, аммо ҳеч вақо қилмаганини биламан. Ахир, у темирданку...”

Карлес Пуйоль бир клубда ўйнади. Фақат. 593та расмий учрашув. 18та гол. Барса таркибида олти марта Испания чемпиони бўлди, икки марта кубок соғиби ва уч бора ЕЧЛ совриндори. Испания терма жамоаси билан эса, жаҳон ва қитъа чемпиони. Яна нима керак футболчи учун, айтингчи? Ҳам совринлар ҳам етарли, майдондаги тантилиги ва адолатлилиги ҳам етарли.

Ажойиб ҳимоячи, футбол учун ўрнак даҳо!

Хайрулла Ҳамидов.