«Манчестер Юнайтед» клуби ва Англия терма жамоаси собиқ футболчиси Уэйн Руни «Ювентус» форварди Криштиану Роналду ва «Барселона» ҳужумчиси Лионель Мессидан қайси бири кучли эканини айтди.

«Биз Криштиану билан бирга ўйнашни бошлаганимизда, у голлар уришнинг унчалик ҳадисини олмаган эди. Аммо жаҳоннинг энг яхши футболчиси бўлишни истаётгани кўриниб турарди.

У жуда кўп шуғулланарди. Бу эса ўз мевасини бера бошлади. Роналду ақл бовар қилмас тўпурарга айланди. У ва Месси, балки, — футбол тарихидаги энг яхши икки ўйинчи.

Аммо Криштиану билан дўст бўлганимга қарамай, мен Мессини танлайман. Шу сабабга кўра мен Хави ва Скоулзнинг ўйинларини томоша қилишни яхши кўрар эдим. Мессининг ўйинида бошқаларда йўқ жиҳатлар мавжуд. Месси катта куч билан зарба орқали гол урганини эслай олмайман. У ўзининг барча голларини техника орқали уради. Ҳаммаси жуда оддий кўринади.

Роналду майдонда шафқатсиз, у қотил. Лекин Месси сени ўлдиришдан олдин қийноққа солади. Шундай таассурот уйғонадики, Месси ўйиндан шунчаки завқ олади», — деди Руни "The Times"га берган интервьюсида.