УЕФА президенти Александр Чеферин Европада мавсумни якунлаш юзасидан ўз фикрини билдириб ўтди.

"Устувор мақсадимиз — мухлислар, ўйинчилар ва клуб ходимларининг соғлиғи. Вазиятга оптимизм билан қараяпман. Ўйлашимча, тез орада баъзи миллий чемпионатлар бошланади. Катта эҳтимол билан учрашувлар томошабинларсиз ўтказилади. Лекин муҳими  — ўйинларнинг ўтказилиши.

Ҳозир соғлиқни сақлаш ташкилотларининг қарорларини кутяпмиз. Ҳозирча мавсум охирига етказилмайди, деб гапиришга ҳаддан ташқари эрта. Бундай вазият клублар ва лигаларга жиддий зарба беради.

Чемпионлар лигаси ва Европа лигаси финал учрашувларини ўтказиш учун дедлайн белгилаб олмадик. Ҳаммаси мавсумни қайта бошлаш учун қачон рухсат олишимизга боғлиқ. Бундан ташқари, ушбу мавсум сентябрь-октябрь ойигача чўзилиши мумкин деб ўйламайман. Акс ҳолда келаси мавсум тақвимини тузиш қийин бўлади", – деди Чеферин "Corriere della Sera"га берган интервьюсида.