26 апрель. 1903 йилнинг шу кунида баск талабалари томонидан Мадридда “Атлетико” клубига асос солинди. Аввалида жамоа мустақил клуб сифатида фаолият юритиши кутилмаган, чунки басклар Испания пойтахтида ўзларининг “Атлетик” жамоаси филиалини очишган эди. Жамоалар либоси ўхшаши ҳам шундан. Бироқ, сал ўтиб, Атлетик клуб де Мадрид номи остида Испания биринчилигига қўшилди. Қарашса, ўйнаб кета оладиган жанговар руҳдаги клуб.
Мана шу қисқа маълумотлардан “Атлетико” нима учун Мадридда туриб Мадриднинг “Реал”ига “Барса”га қараганда жиддий қаршилик кўрсатишини билиб олишимиз мумкин. Жамоа қонида озодлик куйчиси бўлмиш басклар қони оқади.
"Атлетико" Испания футболида "Реал" ҳамда "Барселона"дан кейинги учинчи клуб ҳисобланади. Фақат бугунги куни билан эмас, умумий маънода шу гап. Асос солинган пайти энг арзон матолардан фойдалангани учун “матрасчилар” номини олган клуб – чунки у пайти бу матодан матрас тикишарди – мунтазам икки катта клуб ҳукмронлик қилган 120 йил ичида ўн маротаба мамлакат чемпионлигини қўлга киритгани, аслида жуда яхши натижа. УЕФА лигасиинг уч карра ғолиби. ЕЧЛ финалига уч бора чиққан. Доимо рақибга имкониятни бой берган.
“Атлетико”нинг айби Испания клуби бўлгани. Чунки бу мамлакатда доимо доминатор бўлган икки суперклуб бор. Уларнинг курашига аралашиб яшашга маҳкум жамоа айни пайтда энг чўққисига чиққан. Чунки клуб бу қадар узоқ давр муносиб қаршилик кўрсата олмаган ва жаҳон грандлари сафига қўшила олмаган эди.
Баъзилар айтади, "Атлетико" Симеонега энг кўп пулни бераётган бўлса, жамоа ўйнаши учун энг яхши ўйингоҳларидан бирини қуриб берган бўлса, нега ундан катта натижалар талаб қилмаслигимиз керак. Тўғри, молиявий томондан бу кўрсаткичлар бор гап. Бироқ, эътибор беринг, бу пуллар МанСити ё ПСЖ, ҳатто Челсига ўхшаб олдин тўкиб ташланмади, балки аргентиналик мутахассис ўртамиёна жамоани чўққига олиб чиққач, шунга яраша чўнтак кавлашга мажбур бўлинди. Яъниким, Симеоненинг бу меҳнатларини қадрламаса ва унинг натижаларига яраша стадион қуриб бермаса, уят бўларди. Мана фарқи.
Шунинг учун 117 ёшини нишонлаётган клубни футбол асраб-авайлаши керак. Бойлар ичига бандит кийимида кириб, улардан қартада ютиб олган пулларига яхши либослар сотиб олган ва дарҳол даврага киборлар кўринишида кириб келган жамоани қадрламаслик мумкин эмас. "Реал" ва "Барса" қозонида шу қадар даҳшатли тарзда қайнадики, мавсум давомида мағлубият нималигини билмай келаётган ЕЧЛ чемпионларини хотиржам тўхтата олди. Бу асар футболни шайху переслар эгаллаб олган бир даврда ёзилаётгани ноёбдир.
"Атлетикон"ни ёмон кўришни тўхтатишимиз керак. У футболда кўп қоидаларни бузиш учун, баъзиларнинг устида адолатни ўрнатиш учун келган Зорро каби қаҳрамон аслида. Хуллас, унинг мухлисларини табриклаймиз. Жамоа танлашда адашмагансиз.
Хайрулла Ҳамидов
