Ла лига раҳбари Хавьер Тебас Испания чемпионати 12 июнь куни қайта бошланиши мумкинлигини маълум қилди.

«Соғлиқни сақлаш органлари мавсумни қайта бошлаш санасини тасдиқлаши керак. Кўрилган зарарлардан сўнг биз иқтисодий фаолиятга қайтишимиз керак. Ҳеч ким аниқ санани билмайди, бу коронавирус билан боғлиқ вазиятнинг қандай ўзгаришига боғлиқ. Мен эса чемпионатни 12 июнь санасидан давом эттиришни истардим», — деди Тебас "Marca" нашрига берган интервьюсида.

Тебаснинг айтишича, мавсум қайта бошланганидан кейин Ла лига ва Сегунданинг қолган учрашувлари 35 кун давомида ўтказилади. Барча ўйинлар томошабинларсиз ўтади.

Аввалроқ коронавирусга тестдан ўтказилган Испания клублари футболчилари орасида 5та инфекцияга чалиниш ҳолати аниқланган эди. Уларнинг исмлари ва қайси клуб вакиллари экани маълум қилинмади. Уларнинг барчасида касаллик симптомсиз кечмоқда.