Ўзбек футболида турли қинғирлик, қаллоблик ва келишилган ўйинларга қўл урган шахслар жиноий жавобгарликка тортилиши мумкин. Бу ҳақда Ўзбекистон профессионал лигаси бош директори вазифасини бажарувчи Диёр Имомхўжаев "Футбол плюс" дастурига берган интервьюсида маълум қилди.
Унинг таъкидлашича, Ўзбекистон футбол ассоциацияси президенти Абдусалом Азизов шу кунларда йиғилиш ўтказиб, ўзбек футболида тозалаш ишлари ўтказилишини айтиб ўтган. Бунинг учун тегишли қонун ва ҳужжатларга ўзгартириш киритиш ишлари олиб борилмоқда.
Имомхўжаевнинг таъкидлашича, шу пайтгача қилган ишлари фош бўлган шахслар фақатгина ЎФА тартиб-интизом қўмитаси томонидан маълум муддатга футболдан четлатилган ёки жаримага тортилган. Энди улар бу билан чекланиб қолмасдан, қаллобликка йўл қўйганларга нисбатан жиноий иш очилади.