Туриннинг “Ювентус” клуби ҳужумчиси Криштиану Роналду Aguedo TVучун берган интервьюсида “Челси”дан келиб тушган таклиф ҳақида маълум қилди.

“Мен “Реал” шарафини ҳимоя қилиб юрган чоғларимда “Челси”дан таклиф олдим. Бу қайси йили содир бўлгани аниқ эсимда йўқ, бироқ “аристократлар” менга ажойиб шартнома таклиф қилишган эди. Шундай бўлсада, уларнинг таклифини ўйлаб ҳам кўрмасдан рад этдим. Сабаби, ўша даврларда Мадридда эканлигимдан бахтли эдим.

Тан олиш  лозим, “қироллик клуби”да тўп тепаётган чоғимда кўплаб жамоалардан таклифлар олганман. Таклифлар шу қадар кўп эдики, ҳамма мени кетмоқчи деб тахмин қила бошлади. Афсуски, бу барибир содир бўлди. Тўғри, мен ўзимни “Ювентус”да қайта кашф этяпман, бироқ “Реал”ни тарк этиш жуда оғриқли бўлгани рост. Мен Мадридда ўтган даврларим учун барчадан минаддорман. Бу йиллар менинг хотирамда абадий қолади.

Айни дамда футбол олами корановирусдан азият чекмоқда. Шунга қарамай, бутсаларимни михга илиш ниятида эмасман. “Ювентус”да қолиш ёки кетишим ҳақида бирор нарса дея олмайман. Бу борада башорат қилишим ноўрин. Сабаби, бу футбол ва унда барча нарса содир бўлиши мумкин. Барчасини вақт кўрсатади.