Ўзбекистон футбол ассотсиатсияси томонидан футбол мавсумининг давом эттирилишига қаратилган тайёргарлик ишлари олиб борилмоқда.

Яқин вақт ичида старт оладиган чемпионат ўйинларига жамоалар билан бир қаторда ҳакамлар ҳам қизғин тайёргарлик кўришяпти. Ўзбекистон футбол ассотсиатсияси президенти Абдусалом Азизов томонидан ўтказилган бўлинмалар раҳбарлари иштирокидаги мажлисда ҳакамлар масаласига жиддий эътибор қаратилиб, юқори талаб қўйилганди. Ана шу талабларни бажариш мақсадида ҳакамлар, назоратчилар ҳамда ЎФА биринчи витсе-президенти Равшан Эрматов ва витсе-президент маслаҳатчиси Раҳмиддин Зикрияев иштирокида йиғилиш бўлиб ўтди.

Йиғилишда ҳакамлик масаласига танқидий муносабат билдирилиб, мухлисларнинг футболга бўлган қизиқишини яна-да оширишда ҳакамларнинг профессионал даражада ишлаши жуда муҳим эканлиги таъкидланди. Суперлиганинг бўлажак ўйинлари олдидан рефери ва лайнсменлар ҳалол ҳамда шаффоф фаолият олиб бориши талаб этилди. Ҳар бир мутахассис иши ЎФА раҳбарияти томонидан жиддий назорат қилиб борилади. Йиғилишнинг ўзида аввалги фаолиятида камчиликлар кузатилган бир неча ҳакамлар жиддий огоҳлантириш олди. Чемпионатимизда ишлайдиган ҳакамлардан ўйинларни профессионал ва адолатли бошқариш талаб этилди.

Шу билан бирга ҳакамларнинг ишига таъсир қилувчи ҳолатлар, футболчилар, мураббийлар ва клублар раҳбарлари томонидан ҳакамларга босим ўтказиш ҳаракатларига қарши кескин чоралар кўрилади. Суперлига, Пролига ва барча ички мусобақаларда фақатгина маҳоратли ва фидоий рефериларни саралаб олиш борасида ишлар амалга оширилиши таъкидланди.