Ўзбекистон U-16 терма жамоаси бош мураббийи Олим Шокиров пойтахтимиздаги "Чиғатой" базасида 5 июндан бошланган машғулотлар ҳақида ўз фикрлари билан ўртоқлашди.
- Аслида машғулотларни бошлаш учун 15 март куни йиғилган эдик. Лекин, юртимизда карантин эълон қилинганлиги сабабли, машғулотларни тўхтатиб туришга мажбур бўлдик. Лекин, шунга қарамасдан, шогирдларим 2,5 ой мобайнида уй шароитида машғулотларни ўтказишди. Яқинда юртимизда каратин қоидаларига амал қилган ҳолда, машғулотларга рухсат берилгач, шогирдларимни "Чиғатой" базасига йиғдик ва барчасини бошидан бошлаяпмиз. Каратиндан аввалги режаларимиз бузилганидан кейин, ҳозир янги режа тузишга мажбур бўлдик. Режамизга асосан Озарбайжон ўсмирлар терма жамоаси билан Боку шаҳрида ўртоқлик учрашувини ўтказишни режалаштирганмиз. Шунингдек, август ойида Хорватия ўсмирлар терма жамоаси билан ўртоқлик учрашувида майдонга тушишни мақсад қилгандик. Аммо, бу учрашувлар ҳозирча сўроқ остида турибди. Чунки, аэропортларга қачон рухсат берилади, Озарбайжон, Хорватияларда вазият қанақа, шулар ҳозирча номаълум бўлиб турибди. Бироқ, режа бўйича Ҳалқаро учрашувлар олдимизда турибди, буларни ҳаммасини режа асосида тузганмиз. Буларни ҳаммасини вақт кўрсатади.
Машғулотларда асосан урғуни тўп билан муомила қилишга ва ўйинни ўз назоратимиз остига олишга беряпмиз. Рақибларга қараб ўйин услубимизни ўзгартириб туриш бизнинг режамизга кирган. Энг асосийси, биз ҳужумкор ўйин намойиш этишга ҳаракат қиламиз. Ҳозирда бизнинг энг минимал мақсадимиз - Жаҳон чемпионатига йўлланмани қўлга киритиш. Бу вазифани ЎФА бизнинг олдимизга қўйган. ЖЧга йўлланма олиш шогирдларим учун тажриба вазифасини ўтаб беради" - деди ўсмирларимиз терма жамоаси бош мураббийи Олим Шокиров.
Эслатиб ўтамиз, 5 июндан бошланган машғулотларда 25 нафар футболчи иштирок этмоқда.
