«Реал» ҳимоячиси Хави Санчес «Вальядолид»га ўтди. Бу ҳақда "Қироллик клуби" расмий сайти хабар тарқатди.

23 ёшли футболчининг «Реал» билан шартномаси 30 июнь куни якунига етади. Томонлар келишувни узайтирмасликка қарор қилишди. Шу боис, Санчес жамоани эркин агент сифатида тарк этиб, «Вальядолид» сафига қўшилади. Ҳимоячи 2019/20 йилги мавсумни ушбу жамоа сафида ижарада ўтказаётган эди.

«Клуб Хави Санчесга миннатдорчилик билдиради. У 8 ёшида — 2005 йилда академиямизга келган. Бу вақт давомида у профессионализм, жонбозлик ва намунавий хулқ намойиш этди. Биз унга фаолиятининг кейинги босқичида омад тилаймиз», — дейилади «Реал» матбуот хизмати тарқатган баёнотда.

Санчес «Реал»нинг асосий жамоаси сафида атиги 5та ўйинда майдонга тушди. У "Кастилья" сафида 70та ўйинда майдонга тушиб, 8та гол урган ва 2та голга узатма берган.