«Ювентус» бош мураббийи Маурицио Сарри Италия кубогининг финалида «Наполи»га қарши бўлиб ўтган ўйин (0:0, пенальтилар бўйича — 2:4) борасида ўз фикрини билдириб ўтди.

«Клуб, ўйинчилар ва ишқибозларимизнинг ҳафсаласи пир бўлди. Лекин айни пайтда бундан ортиғини қила олмаймиз. Бизга тезкорлик етишмаяпти. Тўпни яхши назорат қиляпмиз, лекин тажовузкор бўла олмаяпмиз. Шунинг учун тўп назоратини хавфли вазиятларга айлантира олмаяпмиз. Баъзи футболчилар хизматидан фойдалана олмаганим учун бошқача қарор қабул қилишга тўғри келади. Чунки жисмоний тайёргарлигимиз оптимал ҳолатда эмас.

Ўз позициясини эгаллаган рақиб футболчиларидан ўтиб кетишимиз қийин бўляпти. Ваҳоланки, бу ишни одатда яхши бажарар эдик. Бизга интилувчанлик етишмадими? Бундай деб ўйламайман. Чунки 90 дақиқа давомида концентрацияни йўқотмадик.

Роналду? У бошқа ўйинчилар, масалан, Дибала ва Коста каби бир хил формада. Ўз ишини яхши бажариши учун унга кескинлик етишмаяпти.

Ўйиндан кейин футболчилар билан кўп гаплашмадик. Улар каби менинг ҳам кайфиятим тушиб кетган эди. Бундай палла сукут сақлаган маъқул. Эртага гаплашганимиз яхши», — деди Сарри.