«Реал» Испания чемпионатининг 36-туридан ўрин олган «Гранада»га қарши ўйинда икки хил бўлимда икки хил ўйин намойиш этди.
Мадридликлар учрашувни жуда зўр бошлашди. Масалан, қанот ҳимоячиси Ферлан Менди, кутилмаганда, икки ҳимоячи орасидан ёриб ўтиб, жарима майдонига кирди ва ўткир бурчак остида кучли зарба берди. Тўп дарвоза тўсини ва посбоннинг қўллари орасидан ўтиб, тўрга бориб тушди.
Орадан 6 дақиқа ўтиб, Модричдан узатма қабул қилган Бензема жарима майдонига кирди ва олис бурчак сари аниқ зарба бериб, ҳисобдаги фарқни оширди.
Икки тўп фарқи Зидан шогирдларини бироз бўшаштирди. Иккинчи бўлим бошида Мачис зарбавор вазиятга чиқди ва яқин масофадан Куртуа дарвозасини ишғол қилди.
Ўйиннинг асосий вақти тугашига 4 дақиқа қолганида "Гранада" ҳисобни тенглаштириш учун жуда яқин келди. Дастлаб Исмоил Кёйбаши томонидан йўлланган зарбани Куртуа қайтарган бўлса, Азизнинг зарбасини Рамос чизиқ устидан қайтаришга муваффақ бўлди.
Иккинчи бўлимни мана шундай хавотир ва таҳлика остида ўтказган "Реал" ғалабани сақлаб қолди. Мадридликлар 16 июль куни "Вильярреал"га қарши бўладиган ўйинда чемпионликни қўлга киритиши мумкин.
Испания Ла лигаси, 36-тур
Гранада – Реал Мадрид 1:2 (0:2)
Голлар: 0:1 – 10 Менди, 0:2 – 16 Бензема, 1:2 – 50 Мачис.
Гранада – Руй Силва, Дуарте, Диас (Пуэртас, 46), Херман Санчес, Фулькье (Монторо, 55), Азиз, Жил Диаш, Вико (Этеки, 75), Эррера (Антоньин, 75), Мачис (Кейбаши, 85), Фернандес.
Реал Мадрид – Куртуа, Рамос, Менди, Карвахаль, Варан, Каземиро, Кроос, Иско (Родриго, 64), Модрич, Вальверде (Асенсио, 64), Бензема.
Огоҳлантиришлар: Менди (17), Дуарте (46), Жил Диаш (58), Куртуа (90).