Ҳозиргина Ла Лига 37-туридан ўрин олган ўйинлар якунланди.

"Реал" ўз уйида "Вилярреал"ни қабул қилди.

Ўйинда мезбонлар ҳисобни очишди. Карим Бензема биринчи бўлимда дарвозабоннинг оёқлари орасидан рақиб дарвозасини ишғол қилди.

Иккинчи бўлимда эса Серхио Рамос рақиб жарима майдончасида йиқитилди. Бош ҳакам бу вазиятда пенальти белгилади. Одатда, 11 метрлик жарима зарбаларини тепишга одатланган Рамос бу сафар тўпурарлик учун курашаётган Бенземага имконият берди. Карим пенальтини унумли якунлаб, ҳисобни 2:0 кўринишига келтирди.

Ўйин охирларида эса Иборра боши билан чиройли гол киритиб, ҳисобни қисқартирди. Қўшимча дақиқаларда Марко Асенсио ҳам гол урди, аммо ҳужум пайтида ўйин қоидаси бузилгани маълум бўлгач, гол инобатга олинмади.

Шундай қилиб, "Реал" мавсум якунланишига бир тур қолганида Ла Лига чемпионлигини расмийлаштирди.

Ла Лига. 37-тур.

"Реал" — "Вилярреаль"

Голлар: Бензема, 29 (1:0); Бензема, 77 — пенальти (2:0); Иборра, 83 (2:1);

"Эстадио Альфредо Ди Стефано

"Реал Мадрид" – Куртуа, Рамос, Менди, Варан, Карвахаль, Каземиро, Модрич, Азар, Кроос, Родриго, Бензема.

"Вильярреал" – Асенхо, Пау Торрес, Кинтилья, Шакла, Пенья, Мойсес Гомес, Замбо-Ангисса, Морланес, Чуквуэзе, Марио Гаспар, Жерар Морено.