Испания терма жамоаси сафида Жаҳон Чемпионлигини қўлга киритган Давид Вилья жинсий тегажоғликда айбланди.

Skyler B номи остидаги Twitter фойдаланувчиси «Нью-Йорк Сити» футболчиси Давид Вилья томонидан жинсий тегажоғликларга учрагани ҳақида ёзган.

«Мен «Нью-Йорк Сити»да дуч келган хираликлар шу қадар даҳшатли эдики, ҳозирда профессионал спорт ҳақидаги ўйлар ҳам мени қўрқувга солади. Ўша жирканч вазиятлар сабаб фаолият йўналишимни алмаштиришга мажбур бўлди. Бу орзуларимни поймол қилди.

У ерга ишга кирганимда ҳаётимдаги улкан имкониятга эга бўлдим деб ўйлагандим.

Ундан нима олдим? Бу Давид Вилья эди. У менга ҳар куни тегажоғлик қилар, клуб раҳбарлари эса буни кулги билан қарши оларди. Бошидан ўтказган воқеаларни айтиб беришга қодир аёллар — менинг қаҳрамонларим.

Мени ҳайрон қолдирадиган жиҳат шундаки, улар мени ишга ёмон ёндашишда айбларди. Жин урсин, бундай вазиятда албатта ишга бўлган муносабатим ёмон бўлади-да!», — дея ёзади қиз.

Ҳозирча на Вилья, на «Нью-Йорк Сити» ушбу айбловларга муносабат билдармади.

Вилья 2015—2018 йиллар мобайнида «Нью-Йорк Сити»да тўп тепган. Давид фаолиятининг сўнгги йилини Япониянинг «Виссел Кобе» клубида ўтказди. У 2020 йилнинг 1 январида футболчилик фаолиятига якун ясаганини эълон қилганди.