Профессионал бокснинг супер ярим ўрта (-69,85 кг) вазн тоифасида ҳаракат қилаётган Исроил Мадримов (5-0, 5 КО) ўзининг навбатдаги жангини 15 август куни ўтказадиган бўлди.
Мадримов ушбу жангда америкалик 37 ёшли Эрик Уокерга (20-2, 9 КО) қарши рингга кўтарилади. Жанг 12 раундга мўлжалланган. Мадримов ва Уокер ушбу тўқнашув орқали вақтинчалик WBA камари соҳибини аниқлаб беради.
Маълумот учун, Исроил Мадримов ўзининг сўнгги жангини 2020 йил 1 март куни ўтказган. Унда Исроил венесуэлалик Чарли Наваррога (29-10, 22 КО) қарши рингга чиқиб, рақибини 6-раунддаёқ нокаутга учратганди.
Эрик Уокер эса 2019 йил 7 декабрь санасида Дамиан Эзекел Бонеллига қарши жанг олиб бориб, рақибидан очколар эвазига устун келган. У сўнгги бор 2018 йил 22 майида Брандон Адамсга мағлуб бўлган.
Эслатиб ўтамиз, 15 август куни бўладиган жанг оқшомида ўзбекистонлик бошқа бир боксчи Шаҳрам Ғиёсов ҳам жанг қилади.
