«Ливерпуль» ярим ҳимоячиси Фабиньонинг уйига ўғри тушди. Liverpool Echo хабарига кўра, ушбу воқеа футболчилари шериклари билан Англия Премьер-лигаси чемпионлигини нишонлаётган паллада содир бўлган. Маълумот учун, Юрген Клопп жамоаси 22 июль, чоршанба куни «Челси»га қарши баҳс (5:3)дан сўнг бош совринни қабул қилиб олганди.

Полиция вакилларининг маълумот беришларича, футболчининг уйидан бир нечта заргарлик буюмлари, шунингдек, Audi RS6 автомобили ўғирланган. Машина кейинроқ Уиган атрофида топилган.

Фабиньо – уйи тунаб кетилган «Ливерпуль» футболчилари орасида ягона эмас. Аввалроқ шунга ўхшаш ҳолат Садио Маненинг хонадонида ҳам рўй берган, 2019 йилги Мюнхеннинг «Бавария» клубига қарши баҳс пайти ярим ҳимоячининг йўқлигидан жиноятчилар унумли фойдаланишга уринишган. Бундан ташқари, ўғрилардан Деян Ловрен, Роберто Фирмино, Пепе Рейна, Даниэль Аггер ва Ежи Дудек кабилар ҳам жабр кўришган.