«Уфа» ярим ҳимоячиси Остон Урунов 4 август, сешанба куни «Спартак» билан шартнома имзолаши кутилмоқда. 19 ёшли футболчи кеча тиббий кўрикдан ўтди ва ҳозирда клуб қароргоҳида бўлиб турибди.

Россиялик журналист Иван Карпов тарқатган хабарга кўра, воқеалар ривожининг бошқача варианти ҳам мавжуд. «Спартак» бош директори Шамиль Газизовнинг қўлида Бундеслига клубидан Ўруновнинг трансфери борасида 5 миллион евролик таклиф мавжуд. Москваликлар ўзбекистонлик футболчи билан шартнома имзолаган заҳоти Остонни немис клубига сотиб юбориши мумкин. Ўруновга қизиқиш билдирган Бундеслига клубининг номи ҳозирча ошкор қилинмади.

Одатда ФИФА бундай трансферларни тақиқлайди. Аммо коронавирус пандемияси пайтида ФИФА бир мавсум давомида футболчининг 3та клуб сафида рўйхатдан ўтишига рухсат берди.

Қўлга киритиладиган 5 миллион евронинг 20 фоизи, яъни 1 млн евро «Уфа»га тўлаб берилади. Солиқлар, агентлар ҳақи ва бошқа харажатлар учун яна 1 млн евро сарф бўлади. «Спартак» эса атиги бир неча кун ичида 3 млн евро ишлаб олади.

Агар "қизил-оқлар" пулга муҳтож бўлмаса, ўзбекистонлик футболчи Россия чемпионатида қолиши ҳам мумкин. Шамиль Газизов «Спартак» орқали Остоннинг трансфер нархини кўтариб, уни кейинчалик сотиши мумкин.