«Спартак» бош директори Шамиль Газизов можароларга сабаб бўлган «Сочи»га қарши ўйинни (2:2) бошқарган рефери Казарцев ва VARда ишлаган Еськовни умрбод ҳакамликдан четлатишни таклиф қилди.

Эслатиб ўтамиз, кеча бўлиб ўтган учрашувда ҳакам москваликлар дарвозасига 2та шубҳали пенальти белгилаган бўлса, видеоёрдамчи ҳакам унинг хатосини тўғриламади.

«Биринчи вазият — бу пенальти эмас. Нима учун ВАР вазиятга аралашмади? Нима учун ҳакамнинг ўзи видеотакрорни томоша қилиш учун бормади? Уларнинг ҳар иккиси вазиятни пенальти деб ҳисобладими? Ўзимни хотиржам тутишга интиляпман, аммо ички ҳиссиётлар тинчлик бермаяпти. Аввало ҳакамлар бизга қандай ҳолатда пенальти белгиланишию, қачон белгиланмаслигини тушунтириб берсин. Агар ҳар бир турдан кейин ҳакамларнинг қарорларини муҳокама қиладиган кўрсатув ташкил этилса, бу дастурнинг рейтинги юқори бўлади.

Иккинчи вазият борасида эса бошқа клублардаги ҳамкасбларим ҳам ҳайрон бўлишмоқда. Бу майнавозчилик. Бу ҳолат пенальти эканини таъкидлаган бирорта инсонни кўрмадим. Ҳакамлик савияси шунчалар тушиб кетдики, кўзларимизга ишонмаяпмиз. Келинг, футболга ишонамиз.

Казарцев ва Еськов ҳакамлик фаолиятида ишлашдан маҳрум этилиши керак. Иложи бўлса — умрбод», — деди Газизов.